पोहे आणि मी!

पोहे आणि मी!

   08:28       mayur wagh

---

पुण्यात राहून जर पोहे आवडत नसतील तर पुणेकर असल्याचा खोटा अभिमान कोणीही बाळगू नये असे माझे प्रेमळ मत आहे. पुणेकरांच्या आयुष्यात दिवसाची सुरुवात चहाने झाल्यावर नंतर पोहेच असतात. पुणेकर असल्यामुळे हीच सवय मलाही आहे. शालेय जीवनापासून मी पोहे खायला सुरुवात केली आणि तेव्हापासूनच पुणेकर आणि पोहयांचे नाते किती घट्ट आहे याची जाणीव मला झाली.

मी आठवीत असताना 'प्रबोधिनी'जवळच असलेल्या 'उभे' या ठिकाणी पोहे खायचो. गरमागरम चविष्ट सांबर, वर असलेली पिवळी, लाल शेव आणि द्रोणातील चवदार पोहे या गोष्टींमुळे माझा पोहयांकडे ओढा वाढला. दररोज एकदातरी उभेचे पोहे व्हायचे. काही वेळा घरून डबा मिळायचा नाही मग तेव्हा मधल्या सुट्टीत उभेचे पोहे असायचे. साधारण दहावी पर्यंत मी फक्त तिकडचेच पोहे खायचो.

अकरावी-बारावीला जास्त पोहे खायची वेळ आली नाही. ठिकाण बदलल्यामुळे आणि एखाद्याच गोष्टीची आवड निर्माण झाल्यामुळे दुसरीकडे पोहयांची चव ट्राय करायचे धारिष्ट्य केले नाही. पण नंतर फर्ग्युसनला आल्यामुळे नवीन चवी ट्राय करणं मस्ट झालं. म्हणूनच चहाच्या टपरीवर चहाबरोबरच पोहे देखील सुरू झाले. यातच एक पोहयाचे नवीन काहीसे व्हर्जन म्हणता येईल असं खाण्यात आले. आम्ही त्यावेळीस सिंहगड रोडला मित्राच्या घरी रात्री अभ्यास करायला जमायचो. अभ्यासाला जरी जमत असलो तरी खरं कारण वेगळंच असायचे. पहाटे तीन वाजता पोहे खायला आम्ही कमिन्स काॅलेजजवळ जायचो. गरमागरम मटकी सॅम्पल आणि वरती लिंबू पिळलेले पोहे हे पहाटे पहाटे खूप खास लागायचे. आमचे क्वचितच घरी लवकर गेल्यामुळे ते पोहे चुकलेले आहेत पण मुद्दामून त्यांच्यासाठीच रात्र जागवल्याचेही मला आठवत आहे.

कमिन्स बरोबरच कधी लवकर पोहे खावेसे वाटले म्हणजेच १२-१२.३० ला तर कोथरूडला देसाई बंधू आंबेवाल्यांच्या इथे पोहे खायला जायचो. तिकडच्या पोह्यांची चव ओके ओके आहे. कमिन्सच्या आधी अमृतेश्वराला पहाटे पोहे खायला जायचो कारण तेव्हा आम्हाला कमिन्सचा स्पाॅट माहित नव्हता आणि नंतर पुढे पुढे अमृतेश्वराच्या पोहयांची सुद्धा टेस्ट बिघडली. कॉलेजच्या खासकरून शेवटच्या वर्षात भरपूर वेळा कमिन्सवर स्वारी असायची पण नंतर एकदा काॅलेज संपलं आणि ती जागा सुटली.

सध्यातरी आयुष्यात पोहे फक्त घरी खाऊन होतात. मी प्रबोधिनीचाच असल्यामुळे उभेला फक्त प्रजासत्ताक आणि स्वातंत्र्यदिनीच भेट होते. पण कधी चुकून गेलो तरी आठवीतले आणि आठवणीतले दिवस आठवतात आणि तेव्हाचीच चव जिभेवर रेंगाळते.

ता. क. मला उत्तमप्रकारे पोहे करता येतात आणि मी ते करतोही पण एकदा घरी एकटा असताना अंदाज न आल्यामुळे 'य' प्रमाणात पोहे केले आणि मग त्या दिवशी दिवसभर मी फक्त पोहेच खात होतो. त्यामुळेच मी पोहे करायचे टाळतो! मला आवडणारे पोहे कुठे कुठे मिळतात या जागांची यादी पुढे देऊन ठेवतोय, तिकडचे पोहे कसे वाटले ते जरूर मला कळवा. मी वाट पाहतोय!

इकडचे पोहे मला आवडतात!

• उभे स्पोर्ट्स, ज्ञान प्रबोधिनी जवळ, राधिका भेळ च्या शेजारी.
• कमिन्स काॅलेजजवळ (योग्य पत्ता लवकरच अपडेट करतो)
• देसाई बंधू आंबेवाले, कर्वे रोड, कोथरुड. (वेळ बघून जावे, दिवसाढवळ्या फिरकू नये)
• वैष्णवी स्नॅक्स सेंटर, एचपी पेट्रोल पंपाच्या शेजारी, जंगली महाराज रोड.