चहा आणि मी!

चहा आणि मी!

   08:05       mayur wagh

---

                  

माझ्या जीवनात चहाला अनन्यसाधारण महत्त्व आहे. सकाळची सुरुवात चहाने झाली की माझे दिवसभरात 3-4 चहा होतात. दिवसभर बाहेर असल्यामुळे सकाळचा आणि कधीतरी संध्याकाळचा चहा घरी होतो. चहाचे हे 'गोड' व्यसन काॅलेज लाईफ सुरू झाल्यावर लागले आणि यात माझ्या मित्रमंडळीचा फार मोठा वाटा आहे. रोजच्या घडणाऱ्या विविध विषयांवरच्या चर्चा, कमाल लेव्हलचे गाॅसिपिंग आणि त्याच्या जोडीला फक्कड चहा यातच माझे काॅलेज जीवन सामावलेले आहे.

मी अकरावी-बारावीला आबासाहेब गरवारेला आर्टस् करत होतो. रेस्ट इअर असल्यामुळे काॅलेजला जाणे फारसे व्हायचे नाही. पण कधीतरी चुकून गेलो तरी गरवारेच्या बाहेर असलेला चहा हमखास व्हायचा. नंतर पुढील शिक्षणासाठी मी फर्ग्युसन घेतले. तिथेच खरे अस्मादिकांना चहाचे व्यसन लागले. मीडियाचे विद्यार्थी असल्यामुळे 'य' प्रमाणात चर्चा व्हायच्या आणि त्याला ठिकाण म्हणजे अण्णाचे कॅन्टीन! तिकडचा चहा फिका वाटत असला तरी चहाची ती चव मला आवडते. आणि मग नंतर फर्ग्युसनच्या चौथ्या गेटपाशी असलेल्या चहाच्या टपरीवर रोजचा चहा व्हायचा. ते ठिकाण निवडण्यामागचे कारण म्हणजे माझ्या डिपार्टमेंटची बिल्डींग त्याच्या जवळ होती आणि खरे कारण म्हणजे अण्णाचे कॅन्टीन फार लांब होते आणि त्याला चालत जायचा मी कंटाळा करायचो.

असं चहाचे ठिकाण निश्चित झाल्यावर कधीतरी सकाळी, दुपारी लेक्चर झाल्यावर आणि मग संध्याकाळी कॉलेज झाल्यावर चहाचे प्रोग्राम व्हायचे. फर्ग्युसन मधले माझे जवळपास निम्मे आयुष्य मी त्या चहाच्या टपरीवरच व्यतीत केले. एकूणतः फर्ग्युसन मुळे माझे चहाप्रती असलेले प्रेम अधिक वाढले.

आता फर्ग्युसनमधून मी रानडे मधे पुढील शिक्षणासाठी आलोय आणि त्याचबरोबर आलंय माझे चहाबद्दलचे प्रेम! इथे सध्याच आल्यामुळे इकडे असलेल्या चहाच्या वेगवेगळ्या टपऱ्या मी फक्त ट्राय करतोय. पण अजूनही माझ्या जिभेवर फर्ग्युसनच्या बाहेर असलेल्या चहाच्या टपरीवर असलेल्या चहाचीच चव रेंगाळत आहे.

ता.क. मला उत्तम प्रकारे चहा करता येतो पण मी तो करायचा कंटाळा करतो याची वाचकांनी नोंद घ्यावी! तसेच मला आवडणार्‍या चहाच्या जागांची यादी मी पुढे दिलेली असून तिकडचा चहा तुम्हाला कसा वाटला ते जरूर मला कळवा, मी वाट पाहतोय!

इकडचा चहा मला आवडतो!

• फर्ग्युसनमधले अण्णाचे कॅन्टीन.
• फर्ग्युसनच्या चौथ्या गेट बाहेरील चहाची टपरी.
• येवले चहा, हत्ती गणपती समोर.
• जय भोलेनाथ टी हाऊस, पत्र्या मारूती चौक.